Beynəlxalq Türk Dili Olimpiadası davam edir

Mahnı və şeir yarışmasında Azərbaycan təmsilçiləri ikinci olublar

Türkiyədə 11-ci Beynəlxalq Türk Dili Olimpiadası davam edir. Dünyanın 140 ölkəsindən 2 min məktəblinin 19 nominasiyada yarışdığı olimpiadada mahnı müsabiqəsinin finalı xüsusilə yaddaqalan olub.

İyunun 7-də İstanbulun Sinan Erdem idman salonunda 14 ölkə təmsilçisinin iştirak etdiyi finalda bolqarıstanlı Martin Yordanov “Dəli könlüm” mahnısı ilə birinci yeri tutub. Azərbaycan məktəblisi Ayxan Bünyadzadə ikinci yerə layiq görülüb, müsabiqənin üçüncüsü isə Filippin təmsilçisi olub.

Qaliblərə mükafatları Azərbaycan Milli Məclisinin deputatı Qənirə Paşayeva, Türkiyənin məşhur sənətçiləri Ajda Pekkan və Müəzzəz Ərsoy təqdim ediblər.

Möhtəşəm final gecəsi bütün yarış iştirakçılarının birgə ifa etdikləri “Yeni bir dünya” mahnısı ilə yekunlaşıb.

İyunun 8-də “Ankara Arena”da keçirilən şeir ifaçılarının finalı da maraqlı görüntülərlə yadda qalıb. Yekunda Seneqal təmsilçisi Maty Diokhane birinci, Azərbaycandan Türkan Məmmədova ikinci, Gürcüstandan Natali Todadze üçüncü olub.

Mədəniyyət.- 2013.- 12 iyun.- S. 14.